حميد عبيدی
د کانکورآزموینو په درغلیوکې لوی مافیایی ګروپ لاس لري
د تیرو څو کلونو راپدې خوا د کانکور په آزموینو کې درغلي هغه ستونزه ده ،چې ګن شمیر ځوانان یې اندیښمن کړي دي .
د کانکور په آزموینو کې ګډون کوونکي وايي چې دکانکور د آزموینو په درغلیو کې یو مافیایي ګروپ لاس لري او هر کال سلګونو تنو ځوانانو ته د آزموینې پرته د لوړو زده په موسساتو کې دزده کړو زمینه برابروي .
که څه هم هر کال ځوانان د کانکور په آزموینو کې د درغلیو یادونه کوي ،خو تر دې مهاله هم دغې ستونزې ته د پای تکی نه دی کیښودل شوی .
تر هغه مهاله چې د غه مافیايي ګروپ ونه نیول شي د کانکور د درغلیو ستونزه به هواره نشي.
د لوړو زده کړو وزارت چارواکي هم تیرو کلونو کې منلې دي چې د کانکور په آزموینو کې درغلي شتون لري ،خو هغوی تل ټینګار کړی چې ددرغلیو د مخنیوي په موخه د هر کال په تیریدو سره د لوړو زده کړووزارت توان زیاتیږي .
دو کاله وړاندې د لوړو زده کړووزارت د کانکور د آزموینې سیسټم ته یې بدلو ن ورکړ او ټینګار یې وکړ چې ددغه سیسټم په پلي کولو سره تر دیره بریده د درغلیو مخه نیول کیږي ،خو له بده مرغه چې تر دې مهاله هم د درغلیو مخه نه ده نیول شوې .
په آزموینه کې د یو کس په ځای د بل چا ګډون ،د ګډون کوونکي عکس ته د کمپیوتر په ډیټابیس کې بدلون ورکول ، د پیسو په بدل کې یو شمیر ځوانانو ته پرته له آزموینې د لوړو زده کړو په موسساتو کې د زده کړې د زمینې برابرول د هغو ستونزو څخه دي چې تل د کانکور د ګډون کوونکو لخوا پرې نیوکې شوې دي .
پوښتنه دا ده چې ولې دغه مافیایي ګروپ چې د لوړو زده کړو وزارت کارکوونکي هم ورسره لاس لري نه نیول کیږي ؟
په تیرو کلونو کې د لوړو زده کړو وزا رت چارواکو ویلي وه ،چې د دغه وزارت یو شمیر کارکوونکي یې د کانکور په آزموینو کې د درغلیو په تور نیولي دي .
دا خپله په ډاګه کوي چې د کانکور په آزموینه کې په لوړو کچه یو مافیایي ګروپ لاس لري او هر کال د نوموړي وزارت د یو شمیر کارکوونکو په مټ سلګونو تنو ځوانانو ته په نا قانونه توګه د زده کړې زمینه برابروي .
که څه هم د لوړو زده کړو وزارت چارواکي وايي چې د کانکور د نوي سیټسم په مټ یې د درغلیو ټولې لارې چارې بند کړي دي ،خو لیدل کیږي چې اوس هم د کانکور په آزموینو کې درغلئ شتون لري .
د نوموړي وزارت چارواکي وايي چې د کانکور په پخواني سیسټم کې د درغلي شونې وه ،خو د نوي سیسټم په کارولو سره هیڅ څوک نشي کولی چې د بل چا پر ځای آزموینه ورکړي او یا د پیسو په بدل کې یو شمیر ځوانان پرته له آزموینې پوهنتونونو ته کامیاب کړي .
زه په دې باور یم تر څو چې دغه مافیايي ګروپ ونه نیول شي او د قانون منګلو ته ونه سپارل شي د کانکور د درغلئ ستونزه به هواره نه شي .
بی له شکه چې د کانکور د نوي سیسټم په کارولو سره تر یوې اندازې پورې د درغلیو مخه نیول شوې ده ،خوتر هغې کچې پورې چې تمه کیده د درغلیو او لاس وهنو مخه نه ده نیول شوې.
که چیرې د لوړو زده کړو وزارت په هغو څانکوکې چې د کانکور په برخه کې دندې تر سره کوي رښتوني کسان ونه ګمارل شي د درغلیو مخه به ونه نیول شي.
په وار وار سره مې داسې کسان لیدلي دي چې د کانکور د آزموینې لپاره یې پوره چمتوالی نیولی دی ،خو نه دي توانیدلي چې خپلو خوښو پوهنځو ته بریالي شي.
ددغو ځوانانو پر ځای هغه کسان ښو پوهنځیو ته بریالي کیږي ،چې د کانکور مافیایي ګروپ ته نغدې پیسې ورکوي.
د لوړو زده کړو وزارت چارواکو او یوشمیر لوستونکو ته به زما خبرې د منلو وړ نه وي ،خو زه دا په ډاګه ویلی شم چې د طب ،انجنیري ،حقوق ،ژورنالیزم او اقتصاد پوهنځیو ته داسې کسان هم بریالي کیږي چې املا هم نلري .
دا خپله په ډاګه کوي چې دغه کسان د کانکور د مافیايي ګروپ په مټ پوهنتونونو ته لاره پیدا کوي پوهنتونونو ته ددغو کسانو بریالي کیدل دهغو ځوانانو سره لویه جفا ده چې شپه او ورځ د کانکور د آزموینې لپاره چمتوالی نیسي خو په پای کې بیا د هغوی پر ځای داسې کسان ښو پوهنځیو ته بریالي کیږي چې یو ساده عریضه هم نشي لیکلی.
زه په دې باوریم تر هغه پورې چې د کانکور مافیایي ګروپ ونه نیول شي او د قانون منګلو ته ونه سپارل شي د کانکور د آزموینې سیسټم که هره څومره شفاف شي بیا هم د درغلیو مخه نه نیول کیږي.
ددغو کسانود پیژندنې لپاره ساده لاره دا ده چې د لوړو زده کړو وزارت لخوا یو پلاوی وتاکل شي تر څو د هغو کسانو په هکله څیړنه وکړي چې په لوړو نمرو سره ښو پوهنځیو ته لاره پیدا کوي .
ددغه څیړنې په پای کې به په ډاګه شي چې کوم کسان په خپل لیاقت سره بریالي شوي او کوم کسان د لاسوهنو او درغلیو په ترڅ کې بریالي شوي دي .
زه باور لرم هغه کسان چې د درغلیو له لارې پوهنتونونو ته لاره پیدا کوي یوازې د ډیپلوم د اخیستلو په فکر کې دي او د پوهنتو ن د لوست د پای ته رسولو وروسته هم ټولنې ته د خدمت جوګه نه ګرځي.
بالا
بازگشت