محمدآجان غلجی
! پسرلنی لوبه
دپسرلی په ښکلی موسم کی ؛ سپرلنی باد چلیده ؛ ګلان غوړیدل ؛ آسمان برګ او څاڅکی څاڅکی اورښت کیده چی کلیوالو آفتاب بارانک باله ؛ د فوټبال د ډګر شاوخوا ونو غوټی په خندیدو او خلاصیدو وی ؛ هر څه په ژوندی کیدو و ؛ وښو قد یوست ؛ د ونو پاڼی پلنیدی ؛ د نرم اورښت له امله دوړی ختمیدی ؛ وری ؛ خوسکی ؛ او اوزګوړی
څریدل او کله نا کله یو له بله مخامخ او غاړه په غاړه کیدل ؛ بزګرانو ځمکه په یومانو اړول او کښت ته یی چمتو کول ؛ مارغان چغیدل ؛ آسونه ششنیدل ؛ سین غړمبیده او له تیر کاله پاتی په چاپریال کی یی غونډ شوی کثافات دسین په مستی کی ډوبیدل ؛ دځوان شپونکی شپیلی دسین له بله اړخه غږیده ؛ یوه سپیڅلی او ریښتینی
. سپرلنی فضا څرګنده وه
زده کونکی له ښوونځی رخصت شوی و ؛ مازیګر مهال ماشومان او تنکی ځوانان د کلی له شاو خوا د فوټبال په خټین او ساده ډګر کی د لوبی کولو لپاره راټول شول ؛ ځوانانو په بیړه او خوښی دلوبی لپاره ځانو نه چمتو کړل ؛ دکلی ډیر شمیر ځوانان ؛ ماشومان ؛ سپین ږیری او هغه وګړی چه دا مهال په څه نه و بوخت د لوبی دلیدو لپاره راغونډیدل
لوبغاړو د لوبی د جامو له اغوستو وروسته په میدان کی خپل خپل ځایونه ونیول ؛ لوبه پیل او ورو ورو ګرمیده ؛ پیاوړی کیده او جالبیده .
دوه میدانه مساوی تر سره شو ؛ ریفری د دمی پریکړه وکړه ؛ لوبغاړی او لیدونکی د اوبو او شیدو دڅکلو او سا اخیستو لپاره د میدان په یوه ګوښه کی سره ټول شول ؛ نندار چیانو د خپلی خوښی لوبغاړی نازول
شیبی وروسته د جمعیت په مینځ کی د یوی زوروری چاودنی په پای کی یو شمیر مړه ؛ څه ټپیان او ډیر نور ویریدلی او په خاورو او ګردونو کی پټ سپیره وګړی ؛ په ښکاره روغ او له روانی پلوه ټپی کسان څرګند شول
پدی توګه ګلان ورژیدل ؛ ماشومان او ځوانان وژړیدل ؛ مشران ودردیدل ؛ شاوخوا څارویان ورمیدل او کلیوال د روغتون او کورونو پلو وخوځیدل
بالا
بازگشت